តូក្យូ៖ នាយករដ្ឋមន្ត្រីជប៉ុន លោក Fumio Kishida បាននិយាយនៅថ្ងៃចន្ទ ទី១៧ ខែមករានេះថា ជប៉ុននឹងបើកយុទ្ធនាការណ៍ចាក់វ៉ាក់សាំងបង្ការជំងឺកូវីដ-១៩ ដូសជំរុញចំនួនពីរខែ ខណៈមេរោគបំលែងថ្មី Omicron មានការឆ្លងកាន់តែខ្ពស់នៅក្នុងប្រទេស។

លោក Fumio Kishida បានចេញមកចេញការជំរុញឲ្យមានការចាក់វ៉ាក់សាំងបែបនេះ ស្របពេលដែលការបោះឆ្នោតសភាជាន់ខ្ពស់ដែលនឹងធ្វើឡើងនៅចុងឆ្នាំនេះ ។

ជាឧទាហរណ៍ស្រាប់ លោក Yoshihide Suga បានលាលែងពីដំណែងកាលពីឆ្នាំមុន បន្ទាប់ពីករណី COVID-19 មានការកើនឡើងខ្លាំងនៅក្នុងប្រទេសនោះ។

នាយករដ្ឋមន្ត្រីបាននិយាយនៅក្នុងសុន្ទរកថាដែលបង្ហាញពីការចាប់ផ្តើមនៃសម័យប្រជុំសភាថា «រដ្ឋបាលរបស់ Kishida ដាក់អាទិភាពខ្ពស់បំផុតលើការឆ្លើយតបនឹងមេរោគឆ្លង» ។

គួរបញ្ជាក់ផងដែរថា គិតមកត្រឹមពេលនេះ ជប៉ុនបានរាយការណ៍ពីករណីឆ្លងមេរោគកូវីដ១៩ ចំនួន ១ ៨៧៩ ៦៣៩ នាក់ ស្លាប់១៨ ៤៣៣ និងជាសះស្បើយឡើងវិញចំនួន ១ ៧៣៥ ៩០៩ នាក់។ ខណៈអត្រាអ្នកចាក់វ៉ាក់សាំងវិញ យ៉ាងហោចណាស់ពលរដ្ឋជប៉ុន ៨០,៤ ភាគរយបានចាក់ដូសទី១ និងមានត្រឹមតែ០,៩ភាគរយប៉ុណ្ណោះដែលបានចាក់ដូសជំរុញ៕